رواية مع وقف التنفيذ للكاتبة دعاء عبدالرحمن(الجزء الأخير من الفصول)

مش حقيقة ومزيفة لانها لو كانت حقيقة مكنش راح هناك
قال عمرو بشرود وكأنه يحادث نفسه 
حتى لو كده طب ماهو لو تحليلك ده صح يبقى برضه هروح فى داهيه لان التقرير هيطلع زى ماهو عاوز
قال فارس مطمئنا 
متقلقش أنا واثق من تحليلى ولو التقرير طلع زى ماهو عاوز هشكك فيه وهطلب أن الحتة تتحال للجنه تانيه 
قال عمرو ساخطا 
طب ماهو ممكن يرشى اللجنة التانيه برضه 
قال فارس وهو يضيق عينيه بثقة 
متقلقش ساعتها هسبقه بخطوة
تأفف عمرو بضيق وزفر ثم قال 
طب وهو هيعمل كل ده ليه ما كان يحطها سليمة وخلاص

قال فارس متهكما 
أنت عبيط يابنى عاوزه يضحى بحتة سليمة ويخسر فيها ملايين ..
لا طبعا هو أحسنله يدفع رشوة كام ألف لكن يحطلك حتة بملايين لمجرد انه يوديك فى داهية لاء طبعا...
ثم رفع فارس حاجبيه وقال بتفكير عميق 
وده بقى اللى بيأكدلى أن الواد نادر ده بيشتغل فى حكاية تهريب الاثار دى
استند عمرو إلى سور الشرفة وقال بتركيز 
وانت جالك الاحساس ده أزاى 
جلس فارس خلف مكتبه واستند إليه وهو يعبث بصور مهرة الخاصة بعقد القرآن والتى وضعتها والدته على مكتبه 
فقال عمرو بقلق 
فارس أنت معايا 
انتبه فارس وقد شرد قليلا فى صور مهرة وقال بسرعة 
ها معلش يا عمرو انا معاك أهو
أعاد عمرو سؤالة من جديد وهو يقول 
كنت بسألك احساسك ده جه أزاى
قال فارس على الفور 
بص يا عمرو الانسان لما بيحب يأذى حد أول حاجه بتيجى فى تفكيره الحاجات اللى هو بيتعامل معاها دايما .. يعنى مثلا البنت اللى مش كويسه لما بتحب تبوظ اخلاق صاحبتها ولا جارتها ولا أى وحده تانيه شايفه أنها أحسن منها .. أول حاجه بتعملها أنها تحاول تخاليها تتعرف على رجاله أو شباب ليه عملت كده .. لأنها غارقانه فى المستنقع ده وده أول حاجه هتيجى على بالها .. اللى بيشتغل فى المخډرات أو بيتعاطاها لما بيحب يأذى واحد تانى بيعمل ايه .. 
يحاول يخاليه يتعاطى معاه ولو صاحبه رفض بيفكر يوديه فى داهيه ويحطله مخډرات ويبلغ عنه .. 
واحد بياخد رشوة ولما يحب يأذى يعمل للى عاوز ياذيه قضية رشوة ويلبسهالوا ..
واللى حصلك مع نادر بيقول أن نادر ليه فى حكاية الاثار دى علشان كده لما فكر يأذيك فكر يأذيك بنفس الحاجه اللى هو دايس فيها .. 
فهمت
أعتدل عمرو وقال على الفور وكأنه قد تذكر شيئا هاما وقال 
الله يفتح عليك أنت فكرتنى بحاجه مهمه مكنتش واخد بالى منها 
أنتبهت حواس فارس وهو يقول 
افتكرت ايه
قال عمرو بتركيز 
فى مرة أخدت أجازة يومين ونادر هو اللى كان ماسك النبطشية بدالى ولما رجعت وبصيت بالنهار على الموقع لقيت اثار حفر على عمق أكتر من العمق المسموح بيه ولما سألته قالى انها غلطة العمال بس هو لحقها
مسح فارس على شعره وقال بقلق 
أظاهر كده يا عمرو ان الموضوع كبير وخطېر وأن نادر مش لوحده فيه ..المكان اللى بتبنوا فيه الفندق ده معروف أنه مكان أثرى واصلا مش عارف التصريح بالحفر والبنى خرج ازاى للمكان ده ...
زفر عمرو وهو يقول بضيق 
الموضوع شكله كبير علينا أوى يا فارس ... أنت لو بصيت على الاثار اللى خرجت بره مصر وشفت حجمها وعرضها هتعرف ان الاثار دى مش ممكن تكون اتهربت .. الاثار دى خارجه تحت عين أكبر راس فى البلد وباتفاق كمان
نظر فارس أمامه بعينين حازمتين وقال بأصرار 
أنا بقى مش هسيب الموضوع ده يا انا يا هما ...
وفى احد الايام وفى الصباح وقف فارس ينتظر مهرة أمام باب شقته وابتسم عندما وجدها تهبط إليه فى الملابس الجديدة التى اهداها إياها بمناسبة بداية عامها الدراسى الاول فى الجامعة .. نظرت إليه وابتسمت بخجل فقال وهو يتأملها بإعجاب وقال 
قلتى دعاء لبس الثوب الجديد
قالت بدهشة 
لاء هو في دعاء للهدوم الجديدة
ابتسم وهو يومىء برأسه وقال 
قال رسول اللهصلى الله عليه وسلم من لبس ثوبا جديدا فقالالحمد لله الذى كسانى هذا ورزقنيه من غير حول منى ولا قوة غفر له ماتقدم من ذنبه وما تأخر
كررتها خلفة بتلقائية فعقد جبينه وقال بضيق مصطنع 
لاء مينفعش أطلعى غيريها
رفعت حاجبيها وقالت بأعتراض 
ليه دى جميلة اوى وواسعه أهى
صعد درجة من السلم ليقف أمامها مباشرة وقال وهو يداعب وجنتها 
ماهو علشان كده عاوزك تغيريها اصلها حلوه أوى عليكى وخاېف حد يبصلك 
ابتسمت وهى ممسكة بيده التى تداعبها وقالت بخجل 
يالا بقى هتأخر كده 
قال بحب 
اتأخرى براحتك .. أنا اللى هديكى أول محاضرة يعنى هتروحى مع الدكتور
عقدت ذراعيها وهى تقول بعناد 
انا بقى مبحبش الكوسة واصلا محدش هيعرف علاقتنا
ضحك ضحكات رنانة اهتز لها قلبها عشقا ثم قال 
علاقتنا ! هو انتى مش مراتى لا سمح الله
وضعت يدها على لحيته تمسح عليها وتخلل أصابعها برفق داخلها وهى تقول بشغف 
أنا بحب أوى كلمة مراتى دى منك
تلاشت البسمة من وجهه وزاغت أنظاره وهو ينظر إليها شاعر بأحاسيس قوية تجتاحه تجاهها قائلا بصوت رخيم 
أنتى أتعلمتى الحركة دى من مين
قالت بحياء 
أبلة عبير هى اللى علمتهالى وقالتلى انها هتعجبك
أبتلع ريقه وهو يقول بتماسك 
كل اللى تقولك عليه ابقى اسمعى كلامها فيه ماشى 
ضحكت وهى تقول 
ليه بقى
أومأ براسه وهو يغمض عينيه قائلا بمرح 
علشان أنا عارف أنها هتعلمك بضمير
بحث فارس عن مكان يصلح ليأجره ويبدأ فيه تأسيس مكتبه الخاص ويكون قريبا من شارعهم وأخيرا وجده على مسافة قريبة جدا منهم وبدأ فى تاسيسه وحاول البحث عن بعض الاثاث زهيد الثمن ولكنه فى يوم من الايام تفاجأ بدخول مهرة عليه المكتب 
وهى تقول بسعادة
يالا بسرعة يا فارس العربية واقفة تحت
نهض وهو ينظر إليها بدهشة وقال 
عربية ايه يا مهرة اللى واقفة تحت
قالت على الفور وهى تجذبه من يده 
يالا بس الناس هتطلع الحاجه تعالى علشان تقف معاهم
وفجأة وجد بعض الرجال يدخلون عليه المكتب كل منهم يحمل قطعة أثاث خاصة بالمكتب وبدأوا فى وضعها فى الداخل 
وهو واقف ينظر إليهم بدهشة .. جذبها من يدها إلى أحد الاركان وقال بجدية 
فهمينى ايه ده وجبتى الحاجات دى منين وازاى متقوليليش
قالت بمرح طفولى 
انا عندى واحده صاحبتى فى الجامعه باباها عنده محل اثاث صغير كده على قدهم 
قولتلها مرة تجيبلى معاها كتالوج من المعرض ولما شفت الحاجات اللى فيه لقيتها حلوه ورخيصه شويه فنقيت واحد للمكتب هنا وادتها العنوان وبس ..
قال بحدة 
أنتى عيله وبتتصرفى تصرفات عيال والفلوس هدفع فلوس الحاجات دى منين يا مهرة
تألمت من قبضته قليلا حول ذراعها وقالت بخفوت وهى مطرقة للأسفل